ဆရာတော် ဥတ္တမနေ့ အခမ်းအနား ရခိုင်ရဟန်းတော်များ ရွှေတိဂုံစေတီတွင် ကျင်းပ ပြုလုပ်
Posted on 9/8/2010 by
thesunofasia_ashonottama
Tags: သတင်း
မောင်အေး
----------------
ရန်ကုန်မြို့တွင် သီတင်း သုံးနေထိုင်ကြသည့် ရခိုင်ရဟန်းတော်များမှ စုပေါင်းပြီး ၇၁ နှစ်မြောက် ဆရာတော်ဦးဥတ္တမ အထိမ်းမှတ်နေ့ကို ရွှေတိဂုံ စေတီတော်တွင် ( ယနေ့) စက်တင်္ဘလာလ ၈ ရက် နေ့လည်က ကျင်းပ ပြုလုပ်ခဲ့ကြသည်။
“ အာဏာပိုင်တွေက စောင့်ကြည့် နေပါတယ်။ ဒါပေမယ့်လည်း လုပ်စရာ ရှိတဲ့ အလုပ်ကို ဆက်လုပ် ခဲ့ကြပါတယ်။ မူလ စီစဉ်ထားတဲ့ အတိုင်း ဆုတောင်းပွဲကို နေ့လည် ၁ နာရီ ကျော်မှာ စပါတယ်။ ဆရာတော်ကို ရည်မှန်းပီးတော့ ဆီးမီး ပူဇော်တယ်။ မေတ္တာပို့ဆုတောင်းမူကို ပြုလုပ်ခဲ့ကြပါတယ်။ သံဃာ စုစုပေါင်း ၄၁ ပါး တက်ရောက်ခဲ့တယ်လေ” ဦးဆောင် ရဟန်းတော် တပါးက ပြောသည်။
ဆရာတော် အရှင် ဦးဥတ္တမနေ့ ကျင်းပရခြင်းနှင့် ပတ်သတ်ပြီး အဆိုပါ ရဟန်းတော်က ယခုကဲ့သို့ နိရဉ္စရာသို့ ပြောသည်။
“အမှန်ကတော့ မနက်ဖြန်မှ ဆရာတော်ရဲ့နေ့ ဖြစပ်ပါတယ်။ ဒါပေမဲ့ ဦးဇင်းတို့ ဒီနေ့ ကြိုတင်ပြီး လုပ်ရတာက ဒီနေ့က ဥပုသ်နေ့ဆိုတော့ ဦးဇင်းတို့ အပြင်ထွက်ဖို့ အဆင်ပြေတယ်။ ပီးတော့ ဘုရား မှာလည်း လူများ တယ်ဆိုတော့ အဲဒီကြားထဲမှာ ဦးဇင်းတို့လုပ်လိုက်တာဖြစ် တယ်။ မနက်ဖြန် ဆိုရင် ဦးဇင်းတို့ ဒီလောက်လူစုလို့ ရမှာမဟုတ် ဘူး ဒါကြောင့် ဒီနေ့ဘဲ ကြိုတင်ပြီးလုပ်လိုက် တာဖြစ်တယ်။”
အဆိုပါ ဆုတောင်းပွဲတွင် ဆရာတော်ဦးဥတ္တပုံနှင့် ဆရာတော် နိုင်ငံရေး လှုပ်ရှားမှု ကောက်နှုတ်ချက် နှင့် ယနေ့ မြန်မာနိုင်ငံရေးအခြေအနေများကို ရေးသားထားသည့် လက်ကမ်း စာစောင်ကိုလည်း ဖြန့်ဝေခဲ့ကြသည်ဟု သူက ပြောသည်။
အခမ်းအနားသို့ တက်ရောက်ခဲ့ကြ သည့် ရဟန်းတော် တချို့ကို အရပ်ဝတ် ရဲများမှ မေးမြန်း မှုများရှိခဲ့ သော်လည်း တစုံတစ်ရာ ပြဿနာ ဖြစ်ပွားခဲ့ခြင်း မရှိကြောင်း အဆိုပါ ရဟန်းတော်မှ ပြောသည်။
“တချို့ဦးဇင်းတွေက ၁၂ နာရီလောက်ကတည်းက ကြိုပြီး ရောက်နေကြတယ်ဆိုတော့ ရဟန်းတွေ စုနေတဲ့ နေရာတွေကို သူတို့က ဓါတ်ပုံရိုက်တယ်။ ပီးရင် ဦးဇင်းတို့ ဘုရားမှာ ဆုတောင်းဖို့ လာတာ လားလို့ မေးပါတယ်။ ဟုတ်တယ် ဦးဇင်းတို့ဆုတောင်းရအောင် လာတာပါ။ ပီးရင် ဆရာတော်ကြီးတွေ ဟောတဲ့တရားတော်တွေကို လာပီးနား ထောင်တာ ဖြစ်တယ်လို့ဘဲ ပြန်ပြောလိုက်တယ်။ ဖမ်းဆီးတာတို့ ဟန့်တားတာတွေတော့ မရှိပါဘူး တကာ” ဟု ပြောသည်။
ယခုကဲ့သို့ သံဃာအပါး ၄၀ ကျော် တစုတရုံးတည်း ညီညီညာညာဖြင့် ဘုရားဆီးမီးထွန်း ၀တ်ပြုသည်ကို တွေ့ရသည့် အတွက် ဘုရားပေါ်သို့ ရောက်နေသူများနှင့် နိုင်ငံခြားသားများ လာရောက် ကြည့်ရှု ခဲ့ကြသည်ဟု သူက ပြောသည်။
ဆရာတော်အား ရည်စူးပြီး ရွှေတိဂုံစေတီ အရှေ့ဘက်မုခ်တွင် ငှက် ၇၁ ကောင်လွတ်ပေးကာ စေတီမြောက်ဘက် မုခ်ရှိ သွေးဆေးကန်တွင်လည်း ရဟန်းတော်များက ငါးစာများ ကျွေးမွေး လှူဒါန်းခဲ့ကြသည်ဟု သိရသည်။
: ----------------------------------- ----------------------------------- ----------------------------------- :
(နိရဉ္စရာ သတင်းများကို မည်သူ မဆို လွတ်လပ်စွာ ကူးယူ အသုံးပြုနိုင်ပါသည်။ သို့သော် သတင်းရင်းမြစ်နေရာတွင် နိရဉ္စရာ နာမည်ကို ဖေါ်ပြပေးစေလိုပါသည်။)